100 Afghans to Knit & Crochet

Wat is dan nou lekkerder as om in die winter onder 'n handgemaakte gehekelde kombers te sit?

Ek het die afgelope ruk navrae ontvang in verband met die kombers wat ek gehekel en oor geblog het op 13 Julie. Die pragtige ontwerp kom uit die boek 100 Afghans to Knit & Crochet. 

Hierdie kombersie is een wat ek gehekel het met al my oorskiet wol. Ek het glad nie aandag gegee aan kleurskakerings nie wat beteken die kombersie bevat enige kleur waaraan jy kan dink. Ek het al die blokke daarna met een kleur (rooi) in 'n ry kortbeentjies aanmekaar gehekel wat toe alles bymekaar gebring het. 

Dit was 'n baie lekker projek om aan te werk en die blok is ook nie eentonig nie. In elke ry word verskillende steke en tegnieke gebruik wat beteken dat 'n beginner dalk mag sukkel. Maar of jy nou 'n beginner is of nie, dit sal ure se hekel genot verskaf en 'n manier om al die oorskiet wolletjies op te gebruik!

 

A must have for the Knit and Crochet enthusiast!

 

Die boek is propvol wonderlike ontwerpe en beslis deur en deur waarde vir geld. Indien julle belangstel plaas ek hier 'n link sodat julle ook kan weet waar om dit in die hande te kry. 

Dan net so op 'n laaste noot wil ek vra dat indien julle die 'kontak my' vorm gebruik vir 'n navraag moet julle asseblief  onthou om 'n email adres te gee. Ek het navrae gehad wat ek graag sou wou beantwoord maar geen kontak besonderhede is aangestuur nie. 

Lekker hekel almal!

Ripples of is dit Zig Zags?

Hallo hallo julle! Sjoe, ek was lanklaas hier. Hoe het die tyd dan so gou verby gegaan?

Ek het gou kom wys waarmee ek besig is so op hierdie koelerige daggie in die Kaap. Dit is nogals geniepsig buite en die winter wys nog sy laaste tandjies. En wat is dan nou lekkerder as om met so ou lekker sagte snoesige hekelwerkie op die skoot te sit en kuier voor die TV. 

Ek het hierdie patroon gekry op Lucy van Attic24 se blog. Ek hekel dit met Elle Pure Gold double knit. Ek love Pure Gold! Dit is so sag en heerlik om mee te werk en daar is ook nuwe kleure wat nou so pas op die mark is. Ek gebruik al die lekker sagte aardse kleure met hierdie yummie pink daarby. 

Dit is lekker om vir 'n verandering sommer net sulke laaaaaaang rye te hekel. Dit neem my so hele klompie minute om een ry te voltooi maar daar sal geen aanmekaar werk van blokke wees wanneer ek klaar is nie. Dit is 'n bonus sowaar! Kyk, dit is lekker om blokkies te hekel maar daardie aanmekaar sit van almal is iets wat ek glad nie 'like' nie. Ek probeer altyd sover as moontlik om dit te vermy deur die blokkies aanmekaar te hekel soos ek aangaan. 

Ek het nog 'n lang ent om te gaan maar ag wat, dis lekker!!! :)

Tot volgende keer!





Groetnis en ....
Lekker hekel :)

Projek 'Hexagon' is klaar!

 Hexagon motiewe in vars blomme kleure. Romanties, sag op die oog en heerlik warm.

  

Kleurryke blomme om die winter op te warm!

Ek het my 'hexagon throw' klaar gehekel hierdie week en is baie bly nog 'n projek is voltooi.

Niks is mooier as hekelwerk nie!

Die plan was oorspronklik om dit te maak vir my bed maar ek het besluit dat ek net die wol wat ek nog oor het gaan opgebruik en dan stop want ek jeuk om 'n ander een te begin met 'n idee wat ek in my kop het. 

Dit lyk nogal mooi oor my slaapbank en helder ook sommer die hoekie van die huis mooi op.

Tot volgende keer!

Groete

Granny Square en Seshoeke.

Die afgelope week was vriesend koud en ek het myself in die aande besig gehou met 'n hekelwerkie op die skoot.

 

 Ek het onder andere vir myself 'n lekker warm hoedjie gehekel deur 10 "ouma blokkies" [Granny Squares] aanmekaar vas te werk. Die boonste deel bestaan uit 'n ronde motief wat ek gehekel het. Ek het die twee gedeeltes aanmekaar gehekel met slipsteke. Die hoedjie lyk baie oulik met sy omgevoude rand onder en is ook heerlik warm! 

My Seshoekige Motief

Ek is ook besig om hierdie kombersie te hekel wat bestaan uit 'n seshoekige ontwerp. .

Ek hou daarvan om altyd so paar ekstra motiewe te hekel tot by die voorlaaste rondte. Wanneer ek die laaste rondte doen heg ek dit met 'n slipstekie in die ooreenstemmende motief van die kombersie en sodoende groei my kombersie en die beste van alles is ek het geen los drade wat vir my loer nie want ek doen die weg werk van die drade soos ek my motiewe hekel. 

Tot volgende keer dan.....

Lekker hekel!