Hekel Idee: Kleurvolle Granny!

Speel met kleur en hekel 'n Granny met woema!

Dagsê almal!

Hier is vir julle 'n inspuiting kleur om 'n vaal dag op te kikker!

Hier het ek vier gewone Ouma blokkies gebruik en 'n randjie omgehekel met 'n blom motief in die middel. Die kleure is soos volg:

• Blokkie links bo is Pure Gold Phlox met Honey in die middel.
• Blokkie regs bo is Pure Gold Clover met Terracotta in die middel
• Blokkie links onder is Pure Gold Azzure met Blossom in die middel.
• Blokkie regs onder is Pure Gold Chilli met Soft Moss in die middel.
• Eerste rand ry is gedoen met Family Knit Aqua.
• Laaste ry om rand is gedoen met Family Knit Violet.
• Die blom is begin met Clover. 2e ry is Chilli. 3e ry is Terracotta. 4e Ry is Aqua en laaste ry is weer Azzure. 

Soos julle kan sien het ek 'n hele paar sterk kleure gebruik met 'n paar sagte kleure om balans te bring. Ek is mal oor kleur en glad nie bang om sterk kleure te gebruik in my hekelwerk nie. Ek hoop dit inspireer julle om ook te speel met kleurkombinasies.

Die blom is sommer so uit die kop gehekel en ek het ongelukkig nie die patroon neergeskryf nie maar enige blom sal mooi vertoon.

 Die Ierse rose of Blommetjie met 12 blare is twee blomme wat ideaal sal wees. 

 Lekker speel en 'n kleurvolle dag vir julle almal!

Hekelgroete!

♥

Tutoriaal: Hekel 'n Driehoek Ouma Blokkie.

Kom ek wys julle hoe om hierdie maklike driehoek blokkies te hekel!

Hekel Idees: Driehoekie Blokkies.

Kleur A: Begin met 5ks, gls om 'n ring te vorm [Hier kan julle sien hoe om die ring te maak]

Ry 1:  3ks, 3lb in ring, 2ks, 4lb in ring, 2ks, 4lb in ring, 2ks, gs in bo-punt van 3ks. Heg af.

Ry 2: Heg Kleur B in enige 2ks sp. [Werk nou in dieselfde sp die eerste hoekgroep wat bestaan uit 2ks,2hlb,2ks,3hlb];  * 1ks, slaan vlg 2 lb oor en werk in vlg lb [1hlb,1ks]; in vlg sp werk ['n gewone hoekgroep wat bestaan uit 3hlb,2ks,3hlb]*; herh vanaf * tot * nog 1 keer, 1ks,slaan 2lb oor 1hlb in vlg lb, 1ks, gs in 2e ks. Heg af.

Ry 3: Heg Kleur C in 'n hoekspasie en werk 'n eerste hoekgroep, 1ks, * slaan vlg 2hlb oor, 1hlb in vlg hlb, [1ks, 1hlb in vlg 1ks sp]  herh nog 1keer; 1ks, slaan 1hlb oor, 1hlb in vlg hlb, 1ks,** werk nou 'n gewone hoekgroep, 1ks* herh vanaf * tot * nog 1 keer en her dan weer vanaf * tot ** en gs in 2e ks. Heg af.

Ry 4: Heg Kleur D in enige hoekspasie en werk eerste hoekgroep, 1ks, * slaan vlg 2hlb oor, 1hlb in vlg hlb, [1ks, 1hlb in vlg 1ks sp] herh nog 4 keer, 1ks, slaan 1hlb oor, 1hlb in vlg hlb, 1ks, gewone hoekgroep in vlg sp, 1ks, slaan vlg 2hlb oor, 1hlb in vlg hlb, [1ks, 1hlb in vlg 1ks sp] herh nog 4 keer, 1ks, slaan 1hlb oor,, 1hlb in vlg hlb, 1ks, gewone hoekgroep in vlg sp, 1ks, slaan vlg 2hlb oor, 1hlb in vlg hlb, [1ks, 1hlb in vlg sp], herh nog 4 keer, 1ks, slaan 1hlb oor, 1hlb in vlg hlb, 1ks, gs in 2e ks. Heg af. 

Hekel Idees: Driehoekie Blokkie met Ierse Roos.

'n Blommetjie lyk net so mooi op hierdie driehoekies.

In die volgende tutoriaal wys ek julle hoe om hierdie Ierse Roos te hekel. 





Hoe maak mens 'n langbeen? Gaan kyk na die tutoriaal van die Ouma Blokkie. 

Hoe maak mens 'n halwe langbeen? Die halwe langbeen word amper dieselfde gedoen as 'n langbeen met net een verskil. Sodra jy 3 lusse op jou pen het slaan jy die draad om pen en trek dadelik deur al 3 lusse. Dit word dus so gemaak. Slaan draad om pen, druk hekelpen in steek of spasie, slaan draad om pen en haak wol deur die steek of spasie na bo, daar is nou 3 lusse op pen, slaan draad weer om pen en trek deur al 3 die lusse. Dit voltooi die halwe langbeen. 

Lekker hekel!