Hekel Patroon: Hekel 'n Uiltjie Motief!

Hallo aan al die pragtige Hekel Idees lesers!

Vandag deel ek my uiltjie patroon met julle. Kom ek vertel net eers hoe hierdie uiltjie vandag gebore is. 

Het dit al met julle gebeur dat jy partykeer begin met iets en dan is die eindresultaat totaal en al glad nie wat jy in gedagte gehad het nie?

Ek het vanoggend gesit en dink dat ek graag 'n ronde motief wil skryf en het gehekel en geskryf, los getrek en weer gehekel. Dan besluit ek nee ek hou nie van sekere kleure bymekaar nie en so het ek gesit en speel hier met 'n idee vir 'n ronde motief wat op 'n ou CD geplak kan word.  'n Mandala was wat ek in gedagte gehad het maar o wee die kleure wat ek graag sou wou gebruik het ek nie in Vinnis Nikkim nie en ek wou dit met katoen doen. Ek het die ronde motief klaar geskryf sodat dit op die CD kon pas en terwyl ek ontevrede na my eerste gekleurde bont poging sit en kyk besef ek dat ek dit in 'n uil kan omskep. Ek het my filt en knope gaan uitkrap en begin sny en pas en baie bly dat ek ten einde laaste iets kon doen met die patroontjie het ek toe my motief begin hekel in  hierdie blou skakerings. Ek sal eerder nie my eerste poging met julle deel nie! Die uil het glad nie mooi vertoon in die bont motief wat ek eerste gehekel het nie..... ......*glimlag*.... maar uithou aanhou en hier is die patroon vir julle!

Ek hoop julle hou van hom en kan hom goed gebruik!

Kry 'n ou bekertjie koffie of indien dit te warm is gooi 'n lekker lang glas koeldrank [met eish!], skop uit die skoene, ontspan en begin hekel. 'n Rustige musiekie in die agtergrond kan ook wondere verrig! :)

Materiaal gebruik:

• Vinnis Nikkim DK in 4 kleure. 
• 4mm hekelpen.
• 2 Knopies 
• Stukkies filt vir snawel en ogies. 
• Borduurgare.

Begin met Kleur A en werk 5ks, gs om ring te vorm. [Indien verkies begin met 'n garesirkel]

Ry 1: 1ks, 12hlb in ring, slaan 1ks oor wat in begin gemaak is en gs in die 1e hlb. Knip draad en heg af.

Ry 2:  Heg Kleur B in enige hlb van vorige rdte, 3ks, 2lb in dies st,  *1ks, slaan 1hlb oor en werk 3lb in vlg hlb,  * herh van * tot * tot einde van rdte. [Daar moet 6 groepe wees van 3lb elk]. Heg af.

Ry 3: Heg Kleur A in enige 2e lb van 'n groep, 2ks, * 3lb in die hlb wat in die  1e rondte  oorgeslaan is. Werk die steke bo-oor die kettingsteek spasie, 1ks, slaan 1lb oor, 1kb in die vlg lb, 1ks,*; herh van * tot *  einde van rdte en gs in die 2e ks. Heg af.

Ry 4: Heg Kleur B  in enige 1ks sp, 3ks, 2lb in dies sp. Werk daarna 3lb in elk van die oorblywende 11 spasies. Glipsteek in 3e ks. Heg af.

Ry 5: Heg Kleur A in dies st, 1ks, 1kb in vlg 2lb, * 1kb oor ry 4 en in die die 2e lb = middelste lb van ry 3,  1kb in elk van vlg 3lb, werk dan weer 'n kb oor ry 4 in hlb van ry 3, 1kb in elk van vlg 3lb, * herh van * tot * tot einde van rdte.  Glipsteek in 1e ks en heg af.

Ry 6: Heg Kleur C in enige kb, 1ks,  werk 'n kb in elke kb tot einde van rdte, gs in 1e ks maar moenie af heg nie.

Ry 7:  1ks en 1kb in dieselfde steek, * 1kb in elk van vlg 5kb,  2kb in vlg kb, herh van * tot * deur in elke 6e kb te vermeerder.  Glipsteek in 1e ks en heg af.

Ry 8: Heg Kleur D in enige kb, 3ks, werk in dies kb die vlg: [3dslb, 1lb, 1hlb]; werk dan 1kb in elk van vlg 10kb, in vlg kb werk die vlg: [1hlb, 1lb, 3dslb, 3ks, gs terug in dies steek]; werk dan 1 kb in elke oorblywende kb reg rondom die lyfie tot by die begin van oortjie, gs en heg af.

Vlerkies: Hekel 2

Begin met 10 ks, kb in 2e ks vanaf pen, 1hlb, 2lb, werk  2dslb in vlg ks, dan 2lb, 1hlb, en 1kb in laaste ks, 1ks en draai. Herhaal die ry weer soos volg: 1kb in 1ekb, 1hlb, 2lb, 2dslb, 2lb, 1hlb, 1kb en gs in die punt. Heg af.  

Afwerking: 

Werk alle los drade weg. Sny 2 sirkels vir ogies en 'n driehoek vir die snawel uit filt. Werk in plek vas en werk daarna die knope bo oor die sirkels van die oë. Werk dan die vlerkies in posisie vas.

Idees vir die gebruik van die motief. 

• As versiering op 'n kombersie
• Hekel 'n hele paar, plak op ou CD's en gebruik in 'n hang-mobiel
• Versier 'n beanie
• Hekel drie of vier, plak op ou CD's en dan aan 'n satynlint onder mekaar om teen die muur te hang.

Ek is seker julle kan ook nog aan baie ander maniere dink om hierdie uiltjie te gebruik! Geniet dit almal en 'n wonderlike week vir julle almal!

Hekel groete!

♥

Hekel 'n 'funky' koffiebeker jassie!

©Monica Buys

 

Ons hekel 'n 'funky' kleurvolle koffiebeker jassie vandag. Nuut vars en oorspronklik. Daar is baie koffiebeker jassie patrone beskikbaar maar ek wou iets ontwerp wat anders is as die gewone en het toe hierdie ontwerp uitgedink  en ek hoop julle sal net so baie daarvan hou om dit te maak as wat dit vir my was om dit  saam te stel. 

Dit het meet en pas gekos om die ontwerp te laat werk maar ek dink my patroon is aanpasbaar genoeg om te gebruik vir enige grootte koffiebeker. 

 Ek hoop julle hou daarvan!

Ons gaan begin met die bodem.

Ek het Vinnis Colours Nikkim gebruik wat 100% katoen is en 'n 4mm hekelpen maar enige dubbeldraad sal werk.

Die bodem.

Die bodem word begin deur 'n sirkel te hekel wat plat moet wees aan die onderkant en dan knus om die beker vou.

So word die sirkel gehekel:

Begin met 4ks, gs om 'n ring te vorm. 

Ry 1: 1ks, 8hlb in ring,   gs in 1e hlb; [plaas nou 'n merker in hierdie laaste steek]

Oor die merker en die manier wat ek my merker plaas in elke rondte: 

Diegene van julle wat alreeds sirkels gehekel het sal weet dat daar gedurig 'n onooglike lasmerk wys waar daar elke keer in 'n rondte 'n glipsteek gemaak word en jy begin die nuwe ry met 2ks.  Wel, ek probeer maar altyd om die tegnieke van hekel te verbeter en die manier wat ek dit doen   is om die glipsteek te merk, slegs 1ks te maak en dan die glipsteek te ignoreer aan die einde van die rondte. Deur in die eerste volgende st te gs verbloem dit die lasplek waar die volgende ry begin is. 

Ry 2:  1ks,  werk nou 2hlb in dieselfde st en daarna ook 2hlb in elke hlb tot einde van ry. [altesaam 16hlb wat gewerk word]; haal merker uit en slaan die gs oor, gs nou in die 1e hlb en plaas die merker terug in die gs sodat jy presies weet watter steek dit is wat jy moet oorslaan.

Ry 3: 1ks, 2hlb in dieselfde st, 2hlb in elke hlb tot einde van ry [32hlb], verwyder merker, slaan gs oor, gs in 1 ehlb, plaas merker terug

Ry 4: 1ks, 2hlb in dieselfde st, * 1 hlb in elk van vlg 3hlb, 2hlb in vlg hlb, * herh vanaf * tot * tot einde van ry [dit beteken jy gaan in die vlg 3hlb net 1hlb werk maar na elke 3e hlb gaan jy in die 4e een 2hlb werk]; eindig deur weer die merker te verwyder, slaan gs oor, gs in 1e hlb

My beker se bodem het net 3 rye nodig gehad. Indien jou bodem nog groter is as ry 4  kan jy nog 'n ry of 2 ekstra hekel deur ry 4 te herhaal maar vermeerder met elke ry net die aantal steke wat tussen die vermeerderings lê. Dit beteken ry 5 sal lees 1hlb in elk van vlg 4hlb, 2hlb in vlg hlb en ry 6 sal lees 1hlb in elk van vlg 5hlb, 2hlb in vlg hlb. Verder doen jy alles presies dieselfde totdat die  sirkel dieselfde grootte is as  van die  onderkant van die beker.

Nou gaan ons ophou vermeerder sodat die jassie kan begin vou om die beker. So doen ons dit:

Vlg ry en elke ry hierna totdat hierdie  deel van die jassie voltooi is: 1ks, 1hlb in dieselfde st, 1 hlb in elke hlb tot einde van ry, gs in 1e kb..

Die merker word altyd op dieselfde manier verskuif soos voorheen wat beteken dat jou aantal steke vanaf hierdie ry dieselfde bly. Ek het gehekel tot by ry 3 en het dus 32hlb wat ek nou gaan herhaal totdat ek die verlange lengte bereik het.

Hekel totdat dit die onderste deel van die koffiebeker se oor bereik, heg af  en werk dan die rand soos volg:

Randjie:

Heg die volgende kleur in enige hlb, *  2ks, 2lb [langbene] in dieselfde st, slaan vlg 2hlb oor en gs in vlg hlb,* herhaal vanaf * tot * tot einde van rondte en gs terug waar begin is. Heg af.






Boonste deel van jassie:

Begin met 5ks, 1hlb in 3e ks vanaf pen, werk nog 2hlb, 2ks, draai

Vlg ry: 1hlb in 1e hlb, 1hlb in elk van vlg 2hlb,  2ks draai

Herhaal hierdie laaste ry totdat die bandjie lank genoeg sodat dit rondom die beker kan pas vanaf die oor se een kant tot by die ander kant van die oor. Maak 4ks, vou die bandjie in die rondte sodat dit 'n sirkel vorm en  gs nou in die teenoorstaande hoek van die begin van die bandjie, 1ks en werk nou 'n ry kb om hierdie boonste rand en wanneer jy by die 4ks kom werk 4kb bo oor en gs in die 1e kb. Heg af.

Heg vlg kleur aan die onderste rand en herhaal dieselfde randjie wat gebruik is vir die onderste deel maar in plaas van om in hlb te werk moet daar nou in die sykante van rye gewerk word. Sorg net dat die steke eweredig uitmekaar lê. Heg af.

Blommetjies:  Gebruik 'n 4 draad vir die blommetjie met 'n 3.25mm hekelpen. Vir hierdie tutoriaal is  Elle Premier 4 ply katoen in 3 verskillende kleure gebruik.

Begin met 6ks, gs om ring te vorm

Werk in ring soos volg: kb in ring, * 1ks, 2lb, 1ks, kb terug in ring, * herh vanaf * tot * nog 5 keer, gs in 1e kb. Heg af.

Werk nou alle los drade weg met 'n wolnaald.

Gebruik silwer ringetjies en haak die blommetjies vas aan hekelwerk soos op die fotos geillustreer word.

Hekel ook 'n kettingsteek band van sowat 100ks en ryg dit deur aan die boonste deel sodat dit stewig vasgetrek kan word om beker met 'n strikkie wat bokant die oor sit.

©Monica Buys

Jou beker se jassie is kant en klaar! 

Geniet dit :)

Groete en lekker hekel!

Gehekelde Blommetjie vir Kaartjie

Hier is die patroon vir hierdie gehekelde blom wat op die kaartjie verskyn in my vorige artikel.

Gebruik Hekelgare no. 8 en hekelpen 1,5mm.

Ry 1: Begin met 'n garesirkel, 3ks, 15lb in sirkel, gs in 3eks

Ry 2: 3ks, * slaan vlg lb oor, in vlg lb werk [1lb,3ks,1lb]*; herh vanaf * tot * nog 6 keer, slaan vlg lb oor, 1lb in 3ks basis, 3ks, gs in bo-punt van begin 3ks  [8 spasies]

Ry 3: gs in vlg lb, *werk in 3ks sp die vlg [1hlb,3lb,1hlb]; gs in vlg lb;* herh vanaf * tot *  nog 7 keer en Heg af. 

Lekker hekel!

Hekel Idee: Handgemaakte Kaartjie met Gehekelde Blom

'n Handgemaakte kaartjie is altyd 'n wenner. 

 

Gebruik papier in kleur van jou keuse. Ek het wit papier gebruik met 'n dikte van 240gsm.

Sny in verlengde grootte. My kaartjie is 21cm x 15,5cm wat in die helfde gevou 'n kaartjie gee van 10,5cm 15,5cm.

Nadat jy die grootte uitgesny het, vou die kaartjie in die helfde en stryk die vou plat met 'n beenvou. 'n Kredietkaart werk ook goed genoeg indien jy nie 'n beenvou het nie.

Sny uit dekoratiewe papier 'n grootte wat effens kleiner is as die kaartjie. Ek het 'scrapbook' papier gebruik. 

 

Ons gaan nou borduursteke maak rondom die papier maar moet eers gaatjies in die papier maak.'n Goeie idee is om die papier te werk met 'n ongerygde naaldwerk masjien. Dit help om die gaatjies eweredig te hou en die gaatjies loop dan ook sommer in 'n mooi reguit lyn. Baie makliker om dan te borduur!

Gebruik enige hekel katoendraad in 'n nommer 8 om kruis stekies om al vier die randte te werk.

Hekel 'n blommetjie met dieselfde katoen wat gebruik is vir die borduur stekies en werk 'n knopie aan die binnekant.

Gebruik 'double sided tape' om alles in plek te hou. 

So maklik soos dit! 'n Handgemaakte kaartjie vir iemand spesiaal.  

Hekel groete! 

Amigurumi

Wat is Amigurumi?

Amigurumi is 'n Japanese hekel en brei kunsvorm wat  bestaan uit miniatuur opgestopte figure, diere, goggas,monsters asook mitologiese wesens. 

Ami beteken hekel of brei en nuigurumi beteken opgestopte poppie. Die wesentjies se koppe is gewoonlik groot in vergelyking met die lyfies wat hulle vreeslik pikant en 'cute' maak.

 

Amigurumi poppies is nie net 'n oulike geskenkie nie maar word deesdae ook gesien as 'n versamelings item. Hulle word gehekel of gebrei met 'n dun draad en omdat hulle so klein is moet jy  kan fyntjies vat om een te hekel. Gebruik ook 'n kleiner hekelpen grootte as wat jy normaalweg sou gebruik. Die steek wat oor die algemeen gebruik word is kortbene en die meeste van die diertjies word so gemaak dat jy in die rondte hekel. Geen nate nie en die werk word styf gehekel om beter vorm te gee.

Daar word daagliks nuwe Amigurumi gedroggies, monster en wesentjies gebore en gratis patrone is ook beskikbaar vir die van julle wat wil weet hoe om te werk te gaan om een te maak.Amigurumi versamelaars maak deesdae enige iets onder die son in miniatuur vorm. Daar word nou selfs meubels, kos en plante gehekel en gebrei! 

Ek het hierdie teddie gehekel met Elle Crochet no 5 gare en 'n 1.5mm hekelpen. Teddie is net 8cm hoog in sittende posisie en sal maklik gebruik kan word aan 'n sleutelring maar ek is te jammer vir haar en sy het 'n ere-plekkie tussen my ander teddies in die mandjie. Sy het al so paar verjaarsdae gevier en is 'n baie gelukkige klein meisie. Dit is nie my eie patroon nie maar een wat ek 'n paar jaar gelede gekry het op hierdie blog. 

Daar is beslis 'n paar Amigurumi wesentjies wat in my kop rondmaal en dit is dalk tyd dat ek hulle ook lewendig maak en patrone vir hulle skryf. Hou maar dop, miskien speel daar een van die dae 'n familie Amigurumi wesentjies hier op Hekel Idees! :) 

Tot volgende keer, lekker hekel!

Teddiebeer Motief

Hekel hierdie maklike teddiebeer in 'n japtrap. Ideaal om te gebruik as versiering in menige projekte!

Monica se Teddiebeer

Heg aan die regterkant

Hierdie teddiebeer word van die voete na boontoe gehekel en is gehekel met Vinnis Colours Nikkim dubbeldraad en 4mm hekelpen. Die beertjie is 15cm hoog. Gebruik 'n dunner draad indien 'n kleiner motief verkies word. 

Die Bene:

[Hekel 2, 'n linker en regterbeen]

Ry 1: Begin met 5ks, 1hlb in 2e ks vanaf pen, 1hlb in elk van vlg 2ks, 2hlb in laaste ks, 2ks draai

Ry 2: 1hlb in 2e ks vanaf pen, 5hlb, 1ks, draai,

Ry 3: 4hlb, 1ks, draai

Ry 4: 4hlb, Heg af

Hekel die twee dele aan mekaar

Met die volgende ry word die 2 motiewe geheg. Heg die draad in die regterbeen en 'n hekel 'n ry hlb. Beweeg dan oor na die linkerbeen en voltooi die ry hlb tot einde van ry, 1ks, draai (8hlb)

Werk nog 'n ry hlb, 1ks draai

Voltooide motief

Lyf:

2hlb in 1e hlb, 6hlb, 2hlb in laaste hlb, 1ks, draai

Hekel nou nog 4rye hlb, en draai elke ry met 1ks

Volgende ry is 'n verminderingsry vir die skouerdeel: 

 

Slaan 1e hlb oor en hekel 7hlb, slaan vlg hlb oor, 1hlb in laaste hlb, 1ks, draai

Slaan 1e hlb oor en hekel 5hlb, slaan vlg hlb oor, 1hlb in laaste hlb, 1ks, draai

  

Nek en Kop

Borduursteke en felt vir strikdas

gs deur vlg 2hlb, 1ks, 1hlb in dieselfde hlb, 1hlb, 2hlb in vlg hlb, 1ks, draai,

2hlb in 1e hlb, 1hlb in elk van vlg 2hlb, 2hlb in laaste hlb, 1ks, draai,

3hlb in 1e hlb, 4hlb, 3hlb in laaste hlb, 1ks, draai,

3hlb in 1e hlb, 2hlb in vlg hlb, 5hlb, 2hlb in vlg hlb, 3hlb in laaste hlb, 1ks, draai,

slaan vlg 3hlb oor en gs in 4ehlb, 1kb, 1hlb, 2lb, 1hlb, 1kb, slaan vlge 3hlb oor en gs in 1ehlb, heg af.

Borduur nou die gesiggie, en lyne om arms aan te dui. Gebruik felt vir die strikdassie. 

Hoop julle sal die patroon nuttig kan gebruik. 

 

Lekker hekel almal!

Hekel Idees

Hartjie op vierkantige blokkie. 

Gebruik twee kleure katoen of wol en hekel hierdie skaakmat blokkie deur kortbene in rye te hekel en die kleure om te ruil na elke 5e ry. Hierdie blokkie het 20kb en is gedoen in veelvoude van 5 steke. Hekel totdat 20 rye voltooi is en hekel dan 'n randjie van kb rondom. Knip 'n hartjie uit felt en werk met oorhandse steek daarop vas. Baie maklik en effektief. Ideaal vir 'n baba kombersie. Die felt motiewe kan ook afgewissel word met felt blomme of enige ander motief. Gee jou verbeelding vrye teuels! 

 

Kringe in die blom!

Hekel hierdie blom deur 'n sirkel te hekel met 'n dekoratiewe randjie en gebruik glipsteke om die dekoratiewe kringetjies te maak. 

Hierdie blomme is maklik om te maak en kan in 'n verskeidenheid projekte gebruik word. 

Plekmatjies vir bekers of glase.

Nog 'n maklike en vinnige idee. Gebruik katoendraad of dubbeldraad wol en hekel hierdie plekmatjies in 'n japtrap. Houtkrale word in die heel laaste ry ingehekel.

Lekker hekel en wonderlike dag vir julle!

Hekel 'n Hartjie

 Gehekelde Hartvorm.

 

Benodighede: 

• Prestia Jollycast of Gips
• Hartvormige gietvorm
• Water

Bo-kant

Onderkant

Meng bietjie water met Jollycast of Gips tot vloeibaar. Die mengsel moet  loperig genoeg wees sodat dit maklik kan giet. As ek dit in makliker terme kan uitspel: soos pannekoek beslag! Laat eenkant tot behoorlik geset.

Nou kan jy jou hekelpen en wolletjies naderskraap en 'n oortrekseltjie hekel. Ek het begin met 'n sirkel en sommer so met meet en pas vermeerder volgens die hart se vorm. 

Hekel twee kante, plaas hartjie tussen jou motiewe en werk aanmekaar vas. 

'n Vinnige dekoratiewe artikel om te maak. Dit kan ook baie nuttig wees vir 'n deurstop of bo op 'n lessenaar vir al die papiere wat wil wegwaai. 

Op so 'n koue en winderige Kaapse dag dan tot later almal!

Warm bly en lekker hekel!

Hoe om 'n Blommetjie met 12 Blaartjies te hekel.

 

 

Begin met 'n garesirkel. Kom ek wys gou vir die van julle wat nie weet wat 'n garesirkel is nie hoe om te werk te gaan.

Maak jou eerste begin-stekie op jou pen deur 'n glipknoop te maak en die hekelpen daardeur te steek.  Maak nou 'n sirkel met die kortste deel van die draad. Dit vorm die ring of sirkel waarin die eerste ry gewerk word. 

 

Ry 1: 12kb in die sirkel; neem nou die kort draad en trek. Die sirkel trek na mekaar toe sodat al die kb netjies bymekaar kom, ss in 1e kb. Sukkel jy met die sirkel? Begin dan met 5ks, ss om ring te vorm en werk 12 kb in ring.

Ry 2: 1kb in die vlg kb, *2ks, slaan een kb oor, 1kb in vlg kb, herhaal vanaf * tot einde van die ry, ss in die eerste kb (daar moet ses 2ks spasies wees)

Ry 3: *gs binne in vlg 2ks sp; werk nou soos volg in spasie: (2ks,3lb,2ks,ss in dieselfde sp)* herhaal van * tot * in die oorblywende 5 spasies 

Ry 4: (3ks,1kb in kb wat oorgeslaan is van ry 2(dit is in blou gedruk sodat julle presies weet van watter steek gepraat word); 3ks, maak nou 'n kb om die been van die kb in ry 2. (Steek die hekelpen van agter na voor en om die kb van ry 2 en weer na agter soos op die volgende twee fotos geillustreer word; herhaal die stappe tot aan die einde van ry; (twaalf 3ks spasies)

 

Ry 5: Werk nou in elk van die 12 spasies soos volg: *gs binne in vlg 3ks sp; (2ks,3lb,2ks,ss in dieselfde sp)* herhaal van * tot * in die oorblywende 3ks spasies tot einde van ry, ss en heg af.

Ta da! 'n Dubbelblaar Blom! 

 Hoop julle hekel ruikers vol blomme! 

Mooi dag vir almal

*Regstelling: Vingerfout het ingesluip. Let asseblief daarop dat ss moet lees gs = glipsteek.*