Spykersteek

Die Spykersteek 

In Afrikaans noem ons dit die Spykersteek.

In Engels genoem die Spike Stitch.

Hierdie steek is dekoratief en kan op allerlei maniere gebruik word in hekelwerk. 

Boonop is dit maklik om te onthou want die naam vertel al klaar hoe die steek vertoon.  Kyk mooi en jy sal sien dit lyk net soos 'n ry spykers met die koppies wat ewe netjies bo uitsteek. Ek hou daarvan om assosiasie te gebruik wanneer ek iets nuuts leer. Wanneer ek dink aan die Spykersteek sien ek 'n stukkie hout met verskillende lengtes van spykers wat in 'n ry daarin gekap is. Sou die hout in die lengte dwars gesaag word sal mens die spykers kon sien. 

Die hout verteenwoordig vir my die hekelwerk wat eers gedoen moet word sodat die "spykers" daarin gekap kan word. 

Hout = 'n paar kortbeen rye

Spykers = lang verlengde kortbene wat bo-oor die kortbeen rye lê 

Ek hoop dit maak sin julle .....

Kom ek wys gou vir julle hoe maklik dit is. 

Afkortings gebruik: ks = kettingsteek; kb = kortbeen; vlg = volgende; 

Hoe maak mens die kortbeen?

Kortbeen = Steek pen in aangeduide steek, slaan draad om pen en trek deur vanaf die agterkant  na vore, daar is 2 lusse op pen, slaan draad weer om pen en trek deur albei lusse. Dit voltooi die kortbeen.  

Spykersteek is niks anders as 'n verlengde kortbeen nie! Kom ek wys hoe maklik dit is! 

Gryp 'n hekelpen en oorskietwol in 2 verskillende kleure en oefen gou so stukkie.  

Begin met 20 ks in kleur A

Ry 1: kb in 2e ks vanaf pen,  1kb in elk van vlg 18ks, [19kb in ry], 1ks, draai

Ry 2: 19kb, 1ks, draai

Ry 3 - 7: Herhaal ry 2 en aan einde van 7e ry kan draad geknip word en 2e kleur gelas word.

Ry 8:  kb in elk van vlg 2kb, 

steek nou die pen in reg onder die volgende kb, met ander woorde slaan 1ry oor en steek die pen onder die vlg kb in. Op die foto dui die speld aan presies waar hierdie steek gemaak moet word. 

Maak 'n gewone kb in die aangeduide plek en trek die draad egalig na bo. Let daarna op dat die draad nie te styf opgetrek word sodat dit die hekelwerk op 'n knop trek nie. Dit moet net genoeg getrek word sodat dit gelyk en presies op dieselfde hoogte is as die ry waarmee besig is. 

Raai wat? Jy het jou eerste spykersteek gehekel. Maklik is dit nie? Die steke kan in enige patroon oor enige aantal rye gemaak word nes jy wil.

In die foto hierbo kan gesien word hoe 'n dekoratiewe patroon verkry word deur die Spykersteek te gebruik. Daar is ook 2 en 3 rye oorgeslaan om die "spykers" dieper te laat vertoon. Die belangrikste om te onthou is dat daar altyd reg onder die volgende steek ingehekel moet word. Tel maar in die begin die aantal steke in 'n ry totdat jy die steek verstaan anders kan daar maklik 'n steek oorgeslaan word of dit kan ook gebeur dat jy dalk vermeerder. Onthou elke Spykersteek neem die plek in van 'n kortbeen in daardie ry. 

 

Hier het ek in rooi 7 rye kortbene gehekel, in groen 1 ry spykersteek en 3 rye kortbene. Daarna het ek oorgeslaan na rooi en 1 ry spykersteek gewerk. Dit behoort julle 'n idee te gee van hoe hierdie steek gebruik kan word om 'n patroon te vorm.

Jy ken nou nog 'n steek wat jy kan byvoeg om jou hekelwerk mee op te tower van gewoon na uniek. Maak dit jou eie en ontwerp jou eie patrone! 

Lekker hekel en geniet dit! 

♥

Hekelsteek: "Broomstick" Hekelsteek.

Die Broomstick steek word deesdae oral gesien op die net en in die tydskrifte. Dit is 'n pragtige steek om te leer en die eindresultaat is 'n pragtige kantagtige patroon. 

Ek het verskeie navrae gekry en almal wil weet hoe word die steek gewerk. Ek is vanoggend by die huis en het besluit om vir julle 'n tutoriaal te doen. Ek het probeer om die fotos so duidelik as moontlik te neem en alhoewel die son maar baie skaars is hier in die Kaap vanoggend hoop ek dat dit tog duidelik genoeg is sodat julle sommer in 'n japtrap ook hierdie steek sal kan baasraak!

Materiaal benodig: 

In hierdie tutoriaal het ek Vinnis Nikkim gebruik met 'n 5mm hekelpen. Jy kan enige dikte draad gebruik met 'n hekelpen grootte wat geskik is vir die draad. Normaalweg gebruik ek of 'n 3.75mm of 4mm hekelpen wanneer ek met 'n dubbeldraad hekel, maar in hierdie geval het ek 'n nommer groter gegaan omdat ek wil hê die eindproduk moet lossies wees en dit moet goed drappeer wat die ideale voorkoms sal wees vir 'n serp.  

Vir die optel van die lusse benodig jy ook 'n groooooot nommer breipen. Ek gebruik hier 'n 20mm maar jy kan enige groot nommer gebruik. Die grootte van die breipen bepaal die lengte van die lusse wanneer die steek gewerk word.

'n Verdere puntjie is ook dat ek die patroon afwissel met 2 rye kortbene en dan 1 ry Broomstick, weer 2 rye kortbene en 1ry Broomstick. Daar is verskillende kombinasies om die Broomstick te gebruik. Ek gebruik ook veelvoude van 5 in hierdie patroon maar daar is patrone waar veelvoude van 4 byvoorbeeld gebruik kan word. Die beginsel van die patroon is dat sou jy in veelvoude van 5 werk beteken dit jy werk 5 lusse af op 'n keer en in veelvoude van 4 word 4 lusse afgewerk. Binne in elke groepie van 4 of 5 lusse wat van die breipen verwyder word moet daar 'n aantal kortbene gewerk word. Sou ek 4 lusse verwyder moet ek dit vervang met 4 kortbene. Dit klink nog Grieks op hierdie stadium maar kom ek wys julle wat ek bedoel. 

  

Goed kom ons begin! 

Begin met 26 kettingsteke en werk 2 rye kortbene. Die heel eerste kortbeen word in die 2e kettingsteek vanaf pen gewerk wat beteken daar sal 25 kortbene in elke rye wees. Onthou ons werk in veelvoude van 5.

Wanneer die 2e kortbeen ry voltooi is verwyder die hekelpen en steek die breipen deur die lus soos aangedui op die foto. Indien jy regshandig is soos ek dan sal jy van links na regs werk. Indien jy linkshandig is sal jy van regs na links werk. 

Neem die hekelpen en steek deur die volgende kortbeen, slaan die draad om die pen en trek die lus deur na vorentoe. 

Trek die lus lank genoeg uit sodat dit om die breipen gehaak kan word en trek dan die draad stywer. Moet nie die draad te styf  trek nie. Werk lossies want wanneer die hekelpen met die volgende stap deur die lusse gesteek moet word moet daar genoeg spasie wees sodat dit gerieflik die 5 lusse sal kan afhaak. 

Herhaal die stappe soos reeds verduidelik. 

Steek die hekelpen in die volgende kortbeen, haak die draad en trek deur na vorentoe. 

Plaas die lus om die breipen.

Herhaal totdat daar deur al die kortbene gewerk is. Daar is 25 lusse op die breipen.

Steek die hekelpen deur die eerste 5 lusse op breipen en sorg dat die werkende draad aan die agterkant lê. Slaan  die draad om hekelpen en trek dit deur die 5 lusse.

Sodra dit deurgetrek is slaan die draad weer om maak 'n kettingsteek. Dit trek die 5 lusse tesame. 

Die 5 lusse is nou gereed om van die breipen verwyder te word.

Werk nou 5 kortbene in die 5 lus- spasie soos die foto illustreer.

Haak nou die volgende 5 lusse bymekaar op die breipen. 

Jy sal merk dat die werkende draad nie nou aan die agterkant lê nie maar meer na vore trek. Slaan die draad om en trek deur die 5 lusse. 

Daar is nou 2 lusse op die pen. Die heel laaste lus van die laaste kortbeen wat gewerk is plus die lus wat so pas deur die 5 lusse op die pen getrek is. 

Slaan die draad om pen en trek deur albei lusse. 

Hierdie steek tel ook as die eerste kortbeen. Werk nou nog 4 kortbene in dieselfde spasie.

Herhaal die stappe totdat alle lusse in groepe van 5 afgewerk is. Maak 1ks en draai werk om. 

Werk nou weer 2 rye kortbene en maak seker dat daar weer 25 kortbene in elke ry is. 

Na elke tweede ry word die hekelpen verwyder en die breipen word dan weer gebruik om die volgende ry lusse op te tel.  

Die eindresultaat is 'n pragtige kantagtige patroon wat lieflik vertoon. 

Die agterkant van die patroon.

Die voorkant van die patroon.

En dit is dan die "Broomstick" patroon. 

Geniet dit en lekker hekel almal! 

Hekelgroete!

♥

Hekelsteek Kombinasies: 'V" Steek #2: Langbeen groepe.

Pragtige gehekelde patroonsteek om te leer!

Grootte van blokkie: 17 x 17cm

Materiaal gebruik: Elle Pure Gold Dubbeldraad en 4mm hekelpen. 

Spesiale Instruksies in hierdie patroon: Langbeen groep [Afkorting = lbgr] Werk in dieselfde steek die volgende: [2lb,1ks,2lb]

Begin met 35 ks.

Ry 1: 1lb in 4e ks vanaf pen,  * slaan 2ks oor, werk 'n lbgr in vlg ks,  slaan vlg 2 ks oor, 1lb in vlg ks,* herh vanaf * tot * nog 4 keer, 1lb in laaste ks, draai

Ry 2: 3ks, 1lb in vlg lb, *  lbgr in 1ks spasie van vlg lbgr, 1lb in vlg lb, * herh vanaf * tot * nog 4 keer, 1lb in laaste lb, draai

Herhaal ry 2 tot  14  rye voltooi is.

Laaste ry: 2ks, hlb in vlg lb, * 2ks, kb in 1ks spasie van vlg lbgr, 2ks, hlb in vlg lb,* herh vanaf * tot *  nog 4 keer, hlb in laaste steek. Heg af.

Idees: 

• Hekel hierdie blokkie langer vir 'n baie mooi serp!
• Hekel blokkies in verskillende kleure vir 'n mooi kantagtige baba kombersie.
• Gebruik die patroonsteek in lang rye vir 'n lekker groot kombers.
• Hekel 'n toppie of baadjie en gebruik hierdie steek.

Wat jy ookal besluit om te hekel. Hierdie steek is altyd 'n wenner!

Geniet dit en lekker hekel almal!

♥

Hekel Tutoriaal: Krapsteek.

In opvolg van die Kamma Tartan Vadoekie wys ek vandag vir julle hoe om die krapsteek te hekel. Die krapsteek is 'n pragtige steek om te gebruik vir die afronding van items soos vadoekies, kombersies, some van baadjies, moue, krae ens. Dit gee 'n voorkoms van gedraaide koord en lyk net so pragtig om die rand van 'n gehekelde mandjie of selfs 'n babakombersie. 

Die krapsteek is eintlik  'n kortbeen wat in die teenoorgestelde rigting gehekel word. Wanneer 'n gewone kortbeen gehekel word, word die pen in die volgende steek aan die linkerkant gesteek en dan gewerk. Daar word normaal weg na die linkerkant toe gewerk indien jy regshandig is.  Wanneer 'n krapsteek gehekel word, word die pen in die volgende steek aan die regterkant gesteek en dan gewerk. Dit beteken jy werk jou krapsteek na die regterkant toe.  Maar kom ek wys julle hoe maklik dit is! 

Heg die draad in enige steek en werk 1ks, steek dan die pen in die steek wat aan die regterkant lê ....

slaan die draad om die pen

en trek deur die steek na vore [daar is 2 lusse op die pen]

slaan draad weer om hekelpen

en trek deur albei lusse. Dit voltooi die eerste krapsteek. 

steek pen in die volgende steek wat aan die regterkant lê 

haak die lus en trek deur na vore [2 lusse op die pen], slaan draad weer om pen

en trek deur albei lusse.

Herhaal die stappe. Indien jy regshandig is en gewoonlik na die linkerkant beweeg wanneer jy hekel beteken dit dat jy nou na die regterkant beweeg. Indien jy linkshandig is werk dit net anders om. Linkshandiges sal na die linkerkant toe beweeg.  

 

Vadoekies lyk pragtig afgerond met so 'n krapstekie om die buitenste rand.

Pragtige dag almal en lekker hekel!

♥

Hekelsteke: Springmielie Steek

 Die Springmielie Steek [spmst]

Vir die doeleindes van hierdie tutoriaal begin deur 13 ks/e te maak. Werk dan 1lb in die 4e ks vanaf pen. Werk 1lb in elke ks tot einde en draai. In die volgende ry gaan ons nou Springmielie steke werk. 

Gaan soos volg te werk: 

4ks, slaan die 1e en 2e langbene oor en werk 5lb in die volgende lb

Nadat die 5e langbeen voltooi is, verwyder die pen uit die werkende lus. Steek vanaf die voorkant deur die 1e langbeen en haak die werkende lus weer om die pen. 

Trek die werkende lus nou deur die 1e langbeen. Die 1e en 5e langbeen word na mekaar toe getrek en die steke wat tussen-in lê 'pop' na die voorkant van die werk. Slaan die draad om pen en trek deur lus om die spmst  af te sluit.  Dit voltooi die eerste Springmielie steek. 

Maak nog 2ks, slaan volgende 2lb oor en werk weer 5 langbene in die volgende langbeen. Verwyder pen, steek deur 1e langbeen, haak die werkende lus van die 5e langbeen en trek deur die 1e langbeen. 

Slaan draad om pen en trek deur om sodoende die springmielie steek af te sluit. Dit voltooi die 2e springmielie steek.

Maak 2ks, slaan volgende 2 langbene oor en werk weer 5lb in volgende langbeen. Herhaal die stappe presies soos voorheen.  

Nadat die 3e spmst voltooi is werk 1ks, slaan 1lb oor en werk 1lb in die 3e ks en draai.

Werk 3ks, 1lb in vlg sp, 1lb in spmst, 2lb in vlg sp, 1lb in vlg spmst, 2lb in vlg sp, 1lb in vlg spmst, 1lb in vlg sp, 1lb in 3e ks en draai.

 

Werk 4ks, slaan 1e en 2e st oor, spmst in vlg lb, 2ks, slaan vlg 2lb oor, spmst in vlg lb, 2ks, slaan vlg 2lb oor, spmst in vlg lb, 1ks, 1lb in 3e ks, draai. 

Herhaal nou net weer al die stappe soos voorheen. 

Wat gebeur wanneer jy in elke ry springmielie steke wil werk? Ons weet nou die steke 'pop' na die voorkant maar sou ons dit in elke ry doen sal dit nie werk nie. In daardie geval moet ons die springmielie 'pop' na die agterkant toe.

Gaan dan soos volg te werk: 

Voltooi die 5 langbene in steek soos voorheen. 

Maar steek nou die pen van die agterkant af deur die 1e langbeen, haak die werkende lus en trek deur.  

Die steke trek saam en 'pop' na die agterkant toe. Hier is die eerste spmst van voor gedoen en die 2e spmst is van agter gedoen. Die verskil kan duidelik gesien word. 

Dit word gewoonlik genoem 'n Springmielie steek agter of afkorting spmsta en die steek van voor is springmielie steek voor of spmstv. 

Daar is baie verskillende patroon variasies waar die Springmielie steek effens mag verskil afhangende van die steke wat gebruik word maar daar is gewoonlik instruksies by 'n patroon ingesluit om die stappe te verduidelik. 

♥