Hekel Tutoriaal: Granny Ripple Patroon

Wou jy nog altyd geleer het hoe om die Granny Ripple Patroon te hekel? Jy hoef nie verder te soek nie. Vandag wys ek hoe dit gedoen word. Hierdie is een van daardie heerlike patrone wat gebruik kan word om sommer in 'n japtrap 'n kombersie te hekel. Die enigste bietjie konsentrasie is om met die eerste ry te sorg dat alle steke in plek is en die res is sommer doodmaklik en net 'n herhaling.

Ek het in hierdie tutoriaal Raeesah Katoen en 'n 5mm hekelpen gebruik.

En ek gaan maar maak of ek nie die vingerfout sien wat ingesluip het op die foto nie. Het julle dit raakgesien? Hier is 'n leidraad Rippel en Ripple :)

In die boonste foto kan die kettingsteek strook gesien word soos dit aan die voorkant vertoon. Wanneer die strook omgedraai word is daar duidelik hobbels of lussies wat aan die agterkant van elke "V" geplaas is. Die beste afwerking word altyd verkry deur in hierdie agterste hobbels of lussies te werk. Kyk na die foto hier onder. Daar is duidelike swart kolletjies wat aandui presies waar hierdie hobbels lê.

 Goed kom ons begin met die eerste ry!

Ry 1: 

Stap 1: Werk 3lb in die 6e ks vanaf pen; * slaan 2 ks oor, werk 3lb in  vlg ks, slaan weer 2 ks oor en werk 3lb in  vlg ks

Stap 2: Slaan 5 ks oor en werk 3lb in vlg ks [dit gaan die onderste punt van patroon vorm]

Stap 3: Slaan 2 ks oor en werk 3lb in vlg ks

Stap 4: Slaan 2 ks oor en werk in die vlg ks [3lb, 3ks, 3lb] Dit vorm die boonste punt van patroon 

Stap 5: Slaan 2ks oor en werk 3lb in vlg ks, slaan weer 2ks oor en werk 3lb in vlg ks

Herhaal nou Stap 2, 3 en 4. Die ry eindig met 'n boonste punt. [Dit beteken die ry eindig deur in die heel laaste steek 2 groepe te werk = 3lb, 3ks, 3lb]

Werk 5ks en draai indien daar met dieselfde kleur gewerk gaan word in ry 2.

Indien ry 2 met 'n ander kleur gewerk gaan word volg die stappe soos verduidelik in die onderstaande fotos.

Ry 2: 3lb in die eerste 3ks spasie, 3lb in elk van vlg 2 sp/s, die onderste punt word gevorm deur die vlg sp oor te slaan, 3lb in elk van vlg 2 sp/s,  in vlg 3ks sp werk boonste punt deur daarin die vlg te werk: [3lb, 3ks, 3lb]; werk dan in elk van die vlg 2 sp/s weer 3lb, slaan 1 sp oor, 3lb in elk van vlg 2 sp, en in die heel laaste 5ks spasie word weer [3lb, 3ks, 3lb] gewerk. 

Hierdie 2e ry word nou deurgaans herhaal. Die ry sal dus altyd begin met 5ks, en sal altyd eindig met 'n dubbelgroep van 3lb, 3ks, 3lb alles saamgewerk in die laaste 5ks sp.  

Ek hoop julle het die tutoriaal geniet!

Mooi dag verder en lekker hekel!

♥

100 Afghans to Knit & Crochet

Wat is dan nou lekkerder as om in die winter onder 'n handgemaakte gehekelde kombers te sit?

Ek het die afgelope ruk navrae ontvang in verband met die kombers wat ek gehekel en oor geblog het op 13 Julie. Die pragtige ontwerp kom uit die boek 100 Afghans to Knit & Crochet. 

Hierdie kombersie is een wat ek gehekel het met al my oorskiet wol. Ek het glad nie aandag gegee aan kleurskakerings nie wat beteken die kombersie bevat enige kleur waaraan jy kan dink. Ek het al die blokke daarna met een kleur (rooi) in 'n ry kortbeentjies aanmekaar gehekel wat toe alles bymekaar gebring het. 

Dit was 'n baie lekker projek om aan te werk en die blok is ook nie eentonig nie. In elke ry word verskillende steke en tegnieke gebruik wat beteken dat 'n beginner dalk mag sukkel. Maar of jy nou 'n beginner is of nie, dit sal ure se hekel genot verskaf en 'n manier om al die oorskiet wolletjies op te gebruik!

 

A must have for the Knit and Crochet enthusiast!

 

Die boek is propvol wonderlike ontwerpe en beslis deur en deur waarde vir geld. Indien julle belangstel plaas ek hier 'n link sodat julle ook kan weet waar om dit in die hande te kry. 

Dan net so op 'n laaste noot wil ek vra dat indien julle die 'kontak my' vorm gebruik vir 'n navraag moet julle asseblief  onthou om 'n email adres te gee. Ek het navrae gehad wat ek graag sou wou beantwoord maar geen kontak besonderhede is aangestuur nie. 

Lekker hekel almal!

Projek 'Hexagon' is klaar!

 Hexagon motiewe in vars blomme kleure. Romanties, sag op die oog en heerlik warm.

  

Kleurryke blomme om die winter op te warm!

Ek het my 'hexagon throw' klaar gehekel hierdie week en is baie bly nog 'n projek is voltooi.

Niks is mooier as hekelwerk nie!

Die plan was oorspronklik om dit te maak vir my bed maar ek het besluit dat ek net die wol wat ek nog oor het gaan opgebruik en dan stop want ek jeuk om 'n ander een te begin met 'n idee wat ek in my kop het. 

Dit lyk nogal mooi oor my slaapbank en helder ook sommer die hoekie van die huis mooi op.

Tot volgende keer!

Groete

Granny Square en Seshoeke.

Die afgelope week was vriesend koud en ek het myself in die aande besig gehou met 'n hekelwerkie op die skoot.

 

 Ek het onder andere vir myself 'n lekker warm hoedjie gehekel deur 10 "ouma blokkies" [Granny Squares] aanmekaar vas te werk. Die boonste deel bestaan uit 'n ronde motief wat ek gehekel het. Ek het die twee gedeeltes aanmekaar gehekel met slipsteke. Die hoedjie lyk baie oulik met sy omgevoude rand onder en is ook heerlik warm! 

My Seshoekige Motief

Ek is ook besig om hierdie kombersie te hekel wat bestaan uit 'n seshoekige ontwerp. .

Ek hou daarvan om altyd so paar ekstra motiewe te hekel tot by die voorlaaste rondte. Wanneer ek die laaste rondte doen heg ek dit met 'n slipstekie in die ooreenstemmende motief van die kombersie en sodoende groei my kombersie en die beste van alles is ek het geen los drade wat vir my loer nie want ek doen die weg werk van die drade soos ek my motiewe hekel. 

Tot volgende keer dan.....

Lekker hekel!