Hoe om hekelblokkies aanmekaar te werk.

Dit gebeur met almal van ons. Ons leer hoe om te hekel en begin ywerig om die een blokkie na die ander te hekel. Kort voor lank is daar 'n hopie blokkies en dan skielik besef jy dat jy nie 'n idee het hoe om hulle bymekaar te kry nie. Wonder jy ook hoe om al jou blokkies aan mekaar vas te werk? Jy hoef nie verder te wonder nie want dit is eintlik vreeslik maklik.

Daar is verskeie maniere om te werk te gaan. Jy kan die blokkies met rugkante teen mekaar sit en dan 'n ry kortbeentjies deur albei blokkies werk. Met ander woorde doen een kortbeentjie wat deur albei blokkies se ooreenstemmende steke gelyk gedoen word. Hierdie manier veroorsaak dat 'n riffie geskep word en dit kan mooi en dekoratief lyk maar daar is tye wanneer jy die las so onopsigtelik as moontlik wil hou.  En dit is wat ek vandag vir julle wil wys. 

Onsigbare aanmekaar werk van gehekelde blokkies

Plaas die blokkies plat langs mekaar.

Gebruik altyd 'n stomp naald vir die vaswerk van hekelwerk. Dit is noodsaaklik want 'n skerp naald kan die gare of wol split en baie onnet vertoon. 

Ryg die draad deur die naald en begin werk deur onder deur die boonste twee lusse van die blokkie aan die linkerkant te steek.

Voltooi die steek en beweeg dan met die naald oor na die blokkie aan die regter kant.

In die foto links kan duidelik gesien word hoe die naald van bo af deur die boonste twee lusse gesteek word.

Herhaal deur die bogenoemde stappe te volg.

Wees versigtig om nie die gare of wol te styf te trek nie, maar wel stewig genoeg dat dit nie gesien kan word nie.

Rugkant

Voorkant

 

Die eindresultaat: 'n Netjies las wat moeilik is om raak te sien!

Daar is natuurlik nog vele ander maniere maar hierdie bly vir my die beste manier. Nou kan jy aan die werk spring en ook jou blokkies aanmekaar begin vaswerk. 

Lekker hekel almal en sterkte met die vaswerkery. Dit is 'n tydsame proses maar dink net hoe trots jy gaan wees om jou handewerk te wys.

Lekker hekel en mooi bly almal!

 

Fairisle Hekel.

Kleur, wonderlike kleur!

"Fairisle" hekel is wanneer  verskillende kleure wol saam met 'n ry gevoer word sodat die kleur wat benodig word beskikbaar is wanneer kleure geruil moet word. Dit neem so bietjie oefening om dit onder die knie te kry. Aandag moet veral gegee word aan spanning asook egaligheid van jou projek. Die mees kleurvolle  patrone kan gehekel word en dit is ook baie maklik om jou eie patroon te maak met grafiek papier en so paar inkleur potlode.

In Engels is daar 'n hele lys van woorde wat gebruik word soos Tapestry Crochet, Fairisle Crochet,  Bosnian Crochet en nog baie meer! Dit wil voorkom asof elke land sy eie term het daarvoor. Hierdie terme sluit almal die tegniek van werk met verskillende kleure wol in.

www.crochetme.com

Omdat "Tapestry" hekel 'n baie digte tipe van hekelwerk is, leen die tegniek hom uitstekend daaraan toe vir die maak van mandjies en sakke. "Fairisle" is weer wonderlik vir die maak van klere en allerhande mode bykomstighede.




Hierdie mandjie is gehekel met krale en die "Tapestry" tegniek is gebruik. Is dit nie pragtig nie?

www.fancyfibers.com

En jy kan handsakke maak wat by elke uitrusting en geleentheid pas en sommer ook 'n paar inkopie  sakke. Dit kan ook die ideale geskenk wees vir iemand spesiaals.

Hier is 'n blokkie wat ek gedoen het deur gebruik te maak van die "Tapestry" metode wat beteken dat die blokkie aan albei kante dieselfde lyk.

Om te leer wat die verskil is tussen die "Fairisle en Tapestry tegniek kan julle gerus na die video van Deja Jetmir kyk waarin sy die verskil verduidelik asook demonstreer hoe om dit te doen.

Verdere leesstof:

• Sien ook hierdie patroon vir 'n hoedjie! Dit word gefilt nadat dit gehekel is!

• Stap vir stap aanwysings.  

Mooi bly en lekker hekel julle! 

Kom wat wou .. Knook sal ek Knook!

Daar is 'n nuwe tegniek wat almal aan die Knook het. Vir die van julle wat nog nooit van so iets gehoor het nie en dink ek is besig om van my trollie af te spring wil ek sommer gou-gou reg help met meer informasie oor wat se ding Knook is.  

Dit is 'n brei of is dit dalk 'n hekel tegniek? Gats! kom ons sê sommer jy bevredig albei die behoeftes van brei en hekel want jy doen die twee sommer so saam saam. Dit is 'amazing' en die resultaat lyk amper nes brei werk behalwe jy gebruik net een pen. Die pen lyk aan die een kant soos 'n hekelpen en die ander kant soos 'n breipen. 

Wel, toe ek lees van die nuwe tegniek toe is ek behoorlik nuuskierig en bekyk toe so paar youtube videos om te sien hoe mens met die nuwe toorpennetjie werk. En siende dat ek hier onder in Suid Afrika nie so iets kan koop iewers nie besluit ek toe om my eie een te maak want sien, as ek mos iets wil doen dan wil ek nie wag tot eendag nie. Ek wil dit nou doen!

Ek gryp toe my sakkie met al my hekelpenne in en bekyk hulle van nader en sien toe dat party van hulle plastiek is. Tada! 'n Liggie gaan aan in my kop! Ek kry toe 'n kers en steek die aan, kry my tang en druk 'n lekker skerp dik naald in sy bekkie vas en staan met die oor die kers se vlam. Dit het so paar probeerslae gekos maar ek het 'n gat dwarsdeur een van my hekelpenne gekry en opgewonde het ek satynkoord deur die gat geryg en toe begin ek KNOOK! Wow! 

Ek was so opgewonde oor die effek ek moet dit net eenvoudig deel met julle. 

My pen het nou wel nie 'n skerp punt soos 'n breinaald aan die een kant nie en my gaatjie is maar heel onafgerond en skeef maar dit werk nog steeds heel goed. 

Ek kan nie wag om 'n regte Knook pen aan te skaf nie. 

Die produk is deur Leisure Arts uitgevind en hopelik sal dit binnekort ook hier in Suid Afrika beskikbaar wees. Ek kan nie wag nie! 

Daar is 'n beginner stel, 'n meer uitgebreide stel en tot ook videos vir regs en linkshandige mense.

Dit is ysig koud so bly warm julle!

Groete